TEDxOranjestad COUNTDOWN: evento organisa pa Directie Natuur & Milieu y Elever

October 18, 2021

Directie Natuur en Milieu hunto cu √Člever Strategy & Solutions a realisa e conferencia di prensa den Hofi shon shoco na parke Nacional Arikok tocante e evento COUNTDOWN cu lo tuma luga diasabra 30 october parti atardi den e bahada di solo despues di 5or dia atardi. Durante e evento aki lo tin 8 oradornan local; cu ta enfoca riba solucionnan local tocante cambio di clima. Ademas di e oradornan local lo tin streaming di e oradornan internacional y hunto cu un grupo stakeholders lo traha den grupo riba un plan strategico di implementacion di e ideanan presenta.

Kico ta un Countdown event?

COUNTDOWN ta un iniciativa global organisa pa TED y Future Stewards, pa acelera solucionnan concreto pa e crisis climatologico, transformando ideanan den accion. E obhetivo ta pa crea un miho futuro reduciendo mundialmente e emision di gas na mita pa 2030 y pa yega na nett zero pa 2050. TED tabatin e lansamento global di COUNTDOWN na october 2020 via un conferencia virtual. E iniciativa aki ta continua den un summit cu ta tumando luga den e luna aki na Edinburg, Escocia caminda mas cu 100 lider di rond mundo lo reuni pa comparti un plan concreto pa un futuro mas saludabel pa nos tur.

Cada oradornan local lo presenta accionnan concreto cu cada un di nan ya caba ta implementando den nan bida of den nan respectivo companianan. Den nan area di experticio nan ta trata di reduci emision di gas y mehora e medio ambiente. E oradornan di e atardi lo ta Sra Anne Witsenburg, Nichole Danser, Christie Mettes, Gregory FunAFat, Robert-Jan Moons, Elthon Lampe, Chelsy Arilee Arends, Centrale Bank van Aruba.

Countdown lo wordo transminti riba e pagina di Youtube y Facebook di TEDxOranjestad, riba e pagina di Facebook di Directie Natuur en Milieu y via TeleAruba.

Mehoracion di nos medio ambiente y cambio drastico climatologico ta rekeri accion colectivo di nos tur. Cada un di nos por yuda den e proceso. Cada accion maske ta chikito, ta haci un diferencia.

Sigui nos riba medionan social pa haya sa con abo tambe por ta parti di e solucion. #TEDCountdown

Scroll To Top
Departamento di Naturalesa y Medio Ambiente | © 2022