E ley di prohibicion di plastic tambe lo aporta na proteccion di nos turtuga di lama

July 2, 2020

Awe 16 di juni, ta celebra dia mundial di Turtuga di lama. Directie Natuur en Milieu (DNM) ta enfatisa cu e reto mas grandi cu e turtuganan di lama ta enfrenta ta e problematica di plastic.

E ta un topico di sumo importancia considerando cu e ta e motibo principal di morto di e turtuga di lama. Polucion di plastic ta e menasa pa bida marino en general. Tin calcula cu si mundialmente nos continua cu e produccion y uzo excesivo di plastic, aki 30 aña lo tin mas plastic den lama cu pisca.
DNM kier pone enfasis riba 6 especie di turtuga di lama cu ta bishita nos lama den Caribe y cu 4 di nan sigur ta bin pone webo riba nos beachnan na Aruba. Ta trata di e especienan protegi pa leynan local y internacional: Caret (Eretmochelys imbricata), Cawama (Caretta caretta), Turtuga Blanco (Chelonian mydas), Drikil (Dermochelys coriacea), Kemp’s Ridley (Lepidochelys kempii) y e Olive Green turtle (Lepidochelys olivacea).

E prome cuaternan ta pone webo na nos beachnan y ta landa den e lama rond Aruba. Tur e 6 sortonan aki ta aparece riba e lista di ley di proteccion di flora y fauna local. Pero ademas di e leynan di proteccion pa e animal tambe ta importante conscientisacion di nos actonan. Esta tene nos beachnan semper limpi di desperdicio, corda hiba tur bo desperdicio bek cu bo cas y uza menos producto traha di plastic. Nos ley di prohibicion di plastic di un solo uzo, cu ta drenta na vigor 1 di juli 2020 tambe lo aporta grandemente na proteccion di nos turtuganan di lama.

Hopi di nos a yega di wak video riba e medianan social unda cu a haya un turtuga cu un pijp (straw) pega den su nanishi. Of tambe e caso na Zeewijk na unda a haya turtuganan shora den liñanan di pisca. Esaki no solamente mester a impacta nos sentimento, pero tambe mester tawata e momento cu nos hendenan mester a tuma e pasonan pa trece cambio den nos custumber, y stop cu e uzo di plastic desechabel, tambe yama plastic di un solo uzo.

Turtuganan tin un afinacion pa cuminda cu e color cora, oranje y geel. Esaki ta haci cu nan ta bira curioso y ta cuminsa investiga cuminda di e colornan ey. P’e motibo ey, nan ta core peliger ora di bay explora y topa cu plastic en bes di cuminda.

Tambe nos ta recorda un y tur cu e turtuganan ta bestianan pa aprecia y ta castigabel pa mata nan pa cualkier motibo. Tambe nan consumo ta castigabel. Pues, no ta permiti di pisca nan ni come nan. Hendenan cu ta frecuenta nos beachnan, por fabor no bay molestia e turtuganan, y mucho menos purba wanta nan pa subi riba nan of pa saca potret di un acto asina cruel.
Si wak un turtuga di lama ta subi tera of a nota cu tin rastronan di turtuga riba beach, por notifica e organisacion TurtugAruba na 592-9393. TurtugAruba ta haci e trabou di monitor di e actividadnan di e turtuganan di lama na Aruba y ta comparti e datonan cu nos di DNM y henter Aruba.

Scroll To Top
Departamento di Naturalesa y Medio Ambiente | © 2024