DNM a ricbi bishita di experto international di UNESCO riba tema di lama

October 15, 2018

Recientemente Directie Natuur en Milieu (DNM) a haya bishita di experto internacional di UNESCO/IOC ariba e tema interesante tocante oceano y lama. Ariba invitacion di UNESCO Aruba, hunto cu Ministerio di EnseƱansa, Ciencia y Desaroyo Sostenibel experto dr. Cesar Toro a bishita Aruba y a duna un charla na Universidad di Aruba pero a pasa tambe na DNM pa un presentacion.

Ken ta Dr. Cesar Toro?
Dr. Cesar Toro tin un PhD den Physical Oceanography di Universidad di Quebec na Canada.
Dr. Toro ta specialisa den oceanografia dinamica, el a desaroya modelonan hydrodynamico oceanico; a traha riba adaptacion y mitigacion di cambio di clima; desaroyo sostenible, y gobernanza di oceanonan. Desde 2001 Dr. Cesar Toro ta hefe di IOCARIBE, cu ta e oficina regional pa UNESCO/IOC pa Latino America y Caribe. IOC ta e Commision Oceanografico Intergobermental cu UNESCO a funda na 1960, y ta e unico organisacion competente pa ciencianan maritimo pa Nacionan Uni. Dr Cesar Toro a contribui na e strategia di UNESCO/IOC pa aumento di capacidad den Latino America y Caribe relaciona cu Ciencia, Technologia y Innovacion. Dr Cesar Toro tambe ta author y co-author di varios publicacionan incluyendo UNESCO’s Report on Science – “Towards 2030”.

DNM tambe a haya oportunidad di presenta un lista di proyectonan andando pa cu e Parke Marino di Aruba tambe e implementacion di e Natuurbeschermingverordening relaciona cu implementacion di e Congreso di Biodversidad , Ramsar Convention, SPAW Protocol y e SDG-nan. Simplemente poni, DNM a duna informacion ariba Marine Park Project, Coral Reef Protection Project y e cambionan den ROP. Pa cu maneho di proteccion pa nos medio ambiente, a combersa over di e implementacion di e LBS protocol, Basel Convention, cual entre otro a toca e temanan di Solid Waste Management Project, Ban on Single use Plastics and Oxybenzone den sunscreens y Brown Fields and Brown Water Project.

E combersacionan y intercambio a conduci tambe na introduci DNM na e plataforma di OBIS (Ocean Biodiversity and Information Sysytem). Ademas di esaki e temanan tawata ariba e sigiente puntonan: proclamacion di Nacionan Uni ariba e Decada di Ciencia Oceanico pa Desaroyo Sostenible (2021-2030), e importancia y peligro di laman pa islanan chikito, cambio climatico y polucion. Tambe UNESCO/IOC a duna su punto di bista riba e importancia di planificacion maritimo y parkenan maritimo.

Scroll To Top
Departamento di Naturalesa y Medio Ambiente | © 2024