Riba 6 di augustus den conferencia di prensa di Ministerio encarga cu Desaroyo Teritorial, Infrastructura y Medio Ambiente, Departamento di Naturalesa y Medio Ambiente a re-lansa nan website despues cu na 2012 a lans’e prome. E compania Able tech ta esun cu a percura pa esaki un biaha mas.
Conhuntamente cu e compania, DNM a dicidi pa un website completamente nobo y responsive p’asina por implementa technologianan mas nobo. Entre otro pa integra social media platforms manera Youtube video uploader, Facebook etc. E website ta traha cu un CMS-content management system cual ta facilita e personal di comunicacion di DNM pa por mantene e contenido di e website y haci update necesario den realtime. E personal di comunicacion a haya tambe un training extensivo pa esaki.
A traha e website cu e meta pa e ta facil pa nabega pa e usuarionan y tin un apariencia bunita cu potretnan di calidad halto. Tambe e website ta traha den tres idioma cu ta Papiamento, Ingles y Hulandes. Esun na Papiamento tin poco tardansa cu esaki como cu DNM kier pa profesionalnan repasa e idioma pa loke ta trata gramatica y formulacion di frasenan corecto. Esaki lo dura un poco mas.
DNM kier a menciona cu ta inclui tambe tur nos relatonan publica den medionan di prensa riba e website. Den e diferente menu nan riba e website por haya informacion manera leynan cu ta pertenece na topiconan cu DNM ta encarga cu ne. Tambe e plan di maneho di nos Naturalesa y Medio Ambiente di gobierno di Aruba por haya riba e website dnmaruba.org bou e di e menu Topics. E documento ta habri den un browser apart.
DNM kier a gradici tur organisacion y departamento pa nan colaboracion pa contenido y imagennan profesional pa nos website. Danki na gobierno di Aruba y ministerio ROIM pa brinda DNM e oportunidad pa re-launch y maneha nos propio website. Ministerio di ROIM y su personal di comunicacion semper atento pa coopera. BUVO pa revisa nos comunicadonan di prensa prome cu nan publicacion den e medionan di comunicacion.
E potretnan ariba website ta danki na colaboracion di Stimaruba, Jads Dive Center, Parke National Arikok, Aruba Birdlife Conservation, AHATA, ATA y fotografonan Michiel Overstegen, Ayrton Tromp y Armando Goedgedrag.
